(( أهم أخبار الكوكب سريعا )))

كتب اللواء الدكتور/ سامي دنيا

روسيا…
ف روسيا بقا الإسبوع ده ومع أول قرار أخده بوتين في بداية فترة رئاستة الخامسة
إنه عزل سيرجي شويجو وزير الدفاع الروسي وجاب مين بقا… … !!
أندريه بيلوسوف الإقتصادي المحنك
ليه ياعم بوتين كدا….؟؟
قالك علشان سيرجي شويغوا إيده مخرومة حبتين وبيصرف ببذخ على الإنفاق العسكري ونص دخل روسيا رايح للإنفاق العسكري ودا أشبه بحقبة الثمانينيات ايام الإتحاد السوفيتي دا كلام ال BBC
ف بوتين إختار الإقتصادي أندريه بيلوسوف علشان يدمج الإقتصاد العسكري مع الإقتصاد الروسي والجيش يصرف على نفسه…ليه يا عم بوتين…. دا الجيش مكانه الحدود وانت عندك حرب وليلة كبيرة سعادتك قالك منا عايز الجيش الروسي يكون زي الجيش المصري يصرف على نفسه وميحملش موازنة الدولة أي روبل…
وأكد ديمتري بيسكوف إن الأكثر إنفتاحا على الإبتكارات هو اللي هينتصر في المعركة…كل اللي فات ده رغم إنتصار الجيش الروسي في كل المعارك وتقدمه الملحوظ في خاركييف بس بوتين عايز يلعبها إقتصاديا علشان الليلة شكلها مطولة معانا شوية
طبعا سيرجي شويجوا مسكتش و زمانه بيقول….بكرة الأيام تبين….مين قاسي ومين حنين ..سلوفاكيا…فاكرين من سنة كدا كتبت ف تقرير للكوكب إن كل ما الإتحاد الاوروبي يصوت على معونات ودعم لأوكرانيا تطلع دولة سلوفاكيا تعترض وتوقف القرار ومن ساعتها الإتحاد الاوروبي مش عارف يدعم اوكرانيا رسميا انما
إمبارح بقا ملقيوش حل مع سلوفاكيا اللي كل شوية تعترض على المساعدات ….ومؤيدة لبوتين غير إنهم يغتالوا رئيس الوزاراء السلوفاكي روبرت فيكو ويخلصوا منه فعلا روبرت فيكو وهو خارج إمبارح من إجتماع مجلس الوزاراء ولا بيه ولا عليه راح طالع واحد ونشه طلقتين في بطنة
اليابان…وفي اليابان…..حذر المعهد الوطني الياباني للأمراض المعدية من إنتشار مرض قاتل بوتيرة قياسية وأصاب لحد دلوقتي ٩٥٠ ياباني إسمه متلازمة الصدمة السامة للمكورات العقدية …وبينتشر بشكل مرعب ف الشعب الياباني وخصوصا من سن ٣٠ سنة فما فوق طب المرض ده عبارة عن إيه بقي….هو عبارة عن بكتريا غريبة بتسبب نخر في الأطراف وفشل في الأعضاء وليلة سودة سيادتك… وربنا يستر ع الكوكب كله
كوريا الشمالية…نيجي بقا للعم كيم اللي مقطع بطاقته …طلع الإسبوع اللي فات وقال…أنا هعمل تغيير تاريخي للإستعداد للحرب تغيير إيه بس يا عم كيم دا إنت مقطع بطاقتك وفارد عضلاتك ع الكوكب كله وهو صاروخ واحد من عندك الكوكب كله هيطفي النور قالك لاء مش كفاية….!!
والإسبوع اللي فات تفقد نظام صاروخ تكتيكي جديد وهو بيتفقده قالك باااس حلو البتاع ده أنا هبعته لأخويا وحبيبي بوتين علشان يجربه ف اوكرانيا اه مهو الصاحب ليه عند صاحبه إيه غير تلات حاجات….!! طبعا الدنيا هاجت وماجت وكوريا الجنوبية وامريكا قدموا طلب لمجلس الامن علشان ينزلوا عليه عقوبات بس طبعا روسيا وقفت كل حاجة بالفيتو الروسي
أثيوبيا….وبس يا سيدي وقالك هنبني سد النهضة وهنملاه عسل ولبن وكل مواطن إثيوبي هنغطسة في العسل وبعدين نطلعه ونحطه ف اللبن….وبعد ١٣ سنة من العسل واللبن بتاع آبي أحمد بقا عنده ٦ مليون إثيوبي هيموتوا من الجوع والعطش…. دا مش كلامي حضرتك دا كلام الامم المتحدة بس يوم الإتنين اللي فات حصل ف إثيوبيا اللي كل خبراء مصر والعالم توقعوه….
حصل زلزال بقوة ٤.٩ ريختر بس بعيد عن سد النهضة وبعمق ١٠ كيلو
والكلام دلوقتي ان في زلازل تاني هتحصل وهتكون اقوى من كدا واحتمال كبير ان سد النهضة هينهار ويحصل تسونامي وهيمسح السودان من ع الخريطة
عموما ربنا يستر ع السودان
وفي تحيا مصر….فاكرين تقرير الاخبار اللي فات…
لما قولتلكم إن إسرائيل لو إجتاحت معبر رفح …. مش الجيش المصري اللي هيتصدرلهم حضرتك…. لااا في أفكار تانية خارج الصندوق تماما ومش هتنيمهم الليل من الكوابيس
وأدينا شوفنا أول الغيث قطرة….
لما إسرائيل قفلت المعبر ومنعت المساعدات إتحاد القبائل العربية اللي الناس كلها قعدت تهاجم فيه فتح معبر صغنون على القد كدا وعلقوا عليه فرعين نور ودخل منه المساعدات…خد بالك إن دي حتة كدا من طرف المعلقة إنما لو الإتحاد ده حطكم في دماغة…. هتشوفوا النجوم في عز الضهر يا عم النتن ياهووو وخليك فاكر برضوا إن اللي خلص على نص أوكرانيا اللي هما ولاد عمكم ….
وسلمها للجيش الروسي تسليم مفتاح هما قوات فاجنر مش الجيش الروسي
يعني إيه الكلام ده بقي…؟؟؟
وانا مالي مقدرش اقول
خد بالك عزيزي القارئ إن الجيش المصري أكبر من كدا بكتير…. وميحبش يدخل في المهاترات دي…
الجيش المصري لو دخل العاركة هيقلبها لحرب إقليمية وهيدخل علشان يخلص على طول وأمريكا عارفة كدا كويس
كمان في تحيا مصر….
الرئيس السيسي الآن في القمة العربية ال ٣٣ في البحرين وبيناقشوا اهم التحديات للأمة العربية….
سوريا …لبنان…فلسطين…السودان…ليبيا
خمس دول عربية يا مؤمن في قمة المعاناة وربنا يبعد عن مصر كل شر
كمان في تحيا مصر….وفي عز ما الكوكب كله بيطحن في بعضة …وفي عز ما المواطن الاوروبي مش لاقي ياكل…وفي عز بقا ما المواطن المواطن الاوروبي بيتهان السيسي بيفتتح موسم حصاد خير مصر…. الدلتا الجديدة وبيزرع أرض العلمين اللي كانت كلها ألغام من أيام الحرب العالمية التانية
حوالي ٢.٥ مليون فدان حضرتك كانت قبل الحرب العالمية التانية اوروبا كانت مسمياها سلة الغذاء السيسي نضفها من الالغام وزرعها بإيه….؟؟ لا والله المعجزة مش إنه زرعها حضرتك ولا المعجزة انه نضفها من الالغام
المعجزة إن الجيش المصري سلاح المهندسين فرع إدارة المياة عمل أكبر نهر صناعي هناك ومحطة لمعالجة مياه الصرف الزراعي وزرع بيها ٢.٥ مليون فدان…التاريخ الحديث هيقف كتير عند المعجزة دي…مش قولتلكم ان السيسي هو حلواني الجمهورية الجديدة كمان في تحيا مصر…
خبر إتقال كدا في ساندوتش ومحدش أخد باله منه….الخبر بيقول….
ادراج امريكا لشركة ساندفين – انك الكندية ” Sandvin-Inc ” للتكنولوجيا في قائمة الحظر و القيود التجارية…
بسبب مين ….!!! إسكت ….مش طلع بسبب مصر
مالها مصر الغلبانه دي …
عملتلكم ايه…؟؟ قالك ياسيدي … شركة ساندفين – تعاونت مع الحكومة المصرية وزودتها بتقنيات يتم استخدامها في المراقبة الجماعية علي الانترنت و منع انتشار الاخبار المفبركة
و استهداف النشطاء بتوع حقوق الانسان
لحد هنا ممكن يبقا خبر عادي ….
لكن اللي مش عادي بقا …
انك لما تروح علي جريدة السجل الفيدرالي اللي هي “الجريدةالرسميةالامريكية ….
تلاقي التفسير طبعا…
بيقولك : ان العقوبات علي الشركة الكندية سببه ان استخدام الحكومة المصرية لتلك التقنية يتعارض مع الامن القومي الامريكي…و السياسات الخارجية للولايات المتحدة ”
نعم يا روح طنط….!!!بيتعارض مع مين !!!!
قالك بيتعارض مع الامن القومي الامريكي
على فكرة …. الخبر مكتوب كده بالنص
وش كده ؟؟؟؟ يعني لما الحكومة المصرية تراقب اللي ببيعوا الدولار والدهب وبيطلعوا الشائعات اللي بتحارب الاقتصاد المصري على الفيس والسوشيال ميديا…..ده ضد السياسات الخارجية الامريكية ويتعارض مع امنهم القومي !؟؟
دا إيه البجاحة دي !!عرفتوا ليه بقا السيسي ديما بيقول مش هنتكلم عن أي مشروع غير لما يخلص علشان أهل الشر…!!
تحياااااامصر السيسي حرة شاااااامخة…ابية… عفية