اللى فى الصور تحت يبقي الدكتور  ‏حامد جوهر بتاع برنامج عالم البحار وعشان كدا البوست دا عنه وعن حياته مظنش هيشد ناس تقراه لان الراجل لا كان ممثل ولا كان سياسي كان راجل علم والعلم فى البلد دى لا يكال بالبدنجان ياوستاذ

لو انت من المتيمين بحب مسرحية العيال كبرت كان سعيد صالح ألش عليه فى جملة مصاء الخير

من يومين احتفل جوجل بالراجل دا اللى اجيال جت متعرفش عنه حاجه ومحدش من جيلنا قال

نعرف عنه ايه؟

الدكتور من اوائل الناس اللى دخلوا جامعة القاهرة بعد ما اتعملت بفترة صغيرة من الاجيال الاوائل فيها

والغريب بقي انه دخل كلية الطب قعد فيها سنة كان متفوق جدا لكن سابها بمزاجه علشان يسحب ورقه

و يروح بيه كلية العلوم

اتخرج من علوم مع مرتبة الشرف الاولى كان دحيح عصره مقبلش بوظيفة عادية جنب البيت فى القاهرة لا سابها وراح عاش في الغردقة في الثلاثينات عشان يدرس علوم الاحياء البحرية

طبعا الغردقة في الثلاثينات كانت مكان نائء صحرا

كان اول واحد في مصر ياخد الدكتوراه في علوم الاحياء البحرية

وصاحب فكرة انشاء متحفين للاحياء المائية واحد في الغردقة وواحد في السويس

مش بس كدا جنب العلم كان فى ادب تخيل الراجل اللى سعيد صالح اتريق على نطقه لكلمة مساء الخير ده كان عضو مجمع اللغة العربية بداية من 1973

ومش عضو كدا وخلاص لاء دا بوجوده كعضو مجمع اللغة دا خلاهم يعملوا عدد من المعاجم العلمية

اشتغل فى مناصب استشارية بالامم المتحدة وجامعة الدول العربية ووكالة الطاقة الذرية ومنظمة الاغذية والزراعة ومنظمات دولية عديدة

برنامج عالم البحار استمر يتعرض 18 سنة

ومش بس كدا كان صديق شخصى لامبراطور اليابان وكان بيدرس هناك فترة ويزود من علمه دايما

واخيرا الدكتور حامد جوهر يبقي اخو المذيع والفنان على جوهر اللى ظهر فى كذا فيلم وكان بيقدم فى التلفزيون النشرة باللغة الانجليزية لانه كان من ام بريطانية

وختاما كان اسمه دكتور حامد عبدالفتاح جوهر عرفواولادكم على الناس دى وبلاش تسمعوا كلام سمية الخشاب عن التعليم والعلم لأن العلم باقى حتى لو صاحبه مات حتى لو حصل وبقي مادة للسخرية لكن هتفضل العلوم اللى علمها لغيره

#د.رانيا فتيح