لعبة جديدة

د

للشاعرة

مني جلال

بص يا باشا بص يا بيه

عقد جواز وبنُص جنيه

قرب قرب مين هيجرب

عرض خطير ويا عيني عليه .

حاجة أكيد ولا ف الأحلام

زوجة إيجار يا سلام يا سلام

جرّب ولا تسألشِ بكام

قول لي يا سيدي هَتخسر إيه ؟! .

يعني جواز حلو وبالساهل

شعب كريم طبعا يستاهل

طيب وابن حلال مش جاهل

إدعوا كمان ربنا يحميه .

شعب بيعشق ل اختراعات

معروف عنه بتاع حركات

ماشي وعايش بالبركات

أي حوار أهو راشق فيه .

لاجل جنابه الكل يهون

( رحم الله عم المأذون )

كان بيقول دا جواز ميمون

يلا قوام كلنا ننعيه .

بلا قفطان بلا شال ولا عمة

طيب ده اسمه كلام بالذمة ؟

مش مستاهلة نلم اللمة

واتس وفيس ربي يخليه .

يعني جواز وف اقرب نادي

سوسو و توتو وهايدي وشادي

شالوا وحطه كله على دي ..

أي حوار على كام أفيه .

لعبة جديدة أهو بنتسلى

يعني جواز على أيها ملة

حفلة ونعزم كل الشلة

في المفروش أو أي شاليه .

ولا أتعاب ولا نفقة وحسرة

ولا هنروح محكمة الأسرة

بلا أطفال بلا شغل مُناهدة

هم وغم علينا بإيه .

والموضوع وبكل سهولة ..

عقد رخيص وبنمضي عليه .