بقلم الإعلامية/شيماء الشافعي
رغم ان البعض عاملها نكتة وهزار عن ان مختلف الجنسيات بيلجاوا لمصر وفى ناس منهم عملت كوميكس عن الهنود يقولوا لهم ان مصر كامل العدد ومش ناقصين لاجئين بعد اخبار الضربات بين الهند وباكستان
وهم نفسهم اللى ليل نهار يتريقوا على الدولة الفاشلة الضايعة وشايفينها سواد فى سواد
لكن الموضوع مش نكتة
الموضوع دلالة كبيرة وعظيمة على اد ايه مصر آمنة فعلا ومش ضايعة ولا فاشله
الامن ده ما جاش صدفة كده
اولا ده فضل من رب العالمين اللى اختصها بوعده وبأمنه وخلاها بردا وسلاما وقت ان اشتعل العالم كله حواليها
ده دم كتير اندفع من رجالة ابطال فتحوا صدرهم وخدوا الضربة بدالنا عشان نعيش فى سلام
دى مليارات الدولارات اللى اندفعت عتاد وسلاح عشان يكون عندك قوة رادعة تردع بها اى طامع فى ارضك او حتى اى حد مستضعفك وبيحلم يغدر بك
ده تخطيط وقيادة بتفكر ليل نهار ازاى تحافظ على البلد دى رغم كل العالم حوالينا يضرب يقلب كده وفى دول بتممسح من على الخريطة اصلا
ده جهد وتعب و رجالة تاكل الزلط شايلة سلاحها على كتفها وفى وضع استعداد صيف شتا برد حر عيون سهرانة علي الحدود وجوه الحدود لا تغفل ولا تنام
الحمد لله على نعمة مصر …
