على رأى المثل:  فى الوش مراية وفى القفا سِلاَّيَة

كتب: اللواء الدكتور/سامي دنيا

الوعى للجميع

على مسئوليتى الشخصية

هام

■ قبل ما تفكوا الحصار عن غزة… فكوا الحصار إللى عندكم الأول!!!

■ إخواتنا فى المغرب، الجزائر، وتونس، أهلاً وسهلاً بيكم فى ساحة المزايدة العربية، ساحة فيها الصوت العالى أهم من الفعل، وساحة فيها “أنا ضد إسرائيل” بتتقال أكتر ما بتتعمل!!!

■ خلونا نِهْدَى كده ونراجع نفسنا، مش هجومية ولا فوقية، بس قبل ما تيجوا تقولوا “إحنا جايين نفك الحصار عن غزة” إسمحولى أسألكم سؤال “هى بلادكم فعلًا فكت حصارها مع إسرائيل؟ ولا لسه مربوطة بحبال التطبيع والتعاون والتصوير والمصالح؟”

■ يعنى_لو_إنت_مغربى_مثلاً 🇲🇦

■ فأحب_أعرفك إن جيشك شارك من قريب جداً فى مناورات African Lion جنب الجيش الإسرائيلى، مش بس كده، دى تدريبات على حرب الشوارع والأنفاق، نفس إللى بيحصل فى غزة النهاردة!!!

■ وعندكم علاقات دبلوماسية كاملة، وسفير إسرائيلى قاعد بيشرب قهوته فى الرباط عادى جداً، وإتعمل بينكم صفقات فى الأمن السيبرانى والطيران والمراقبة، يعنى فى النهار تدريب مشترك، وبالليل تقول “أنا مع فلسطين”… ده تضارب مصالح ولا نفاق إستراتيجى؟

■ لو_إنت_تونسى_بقى 🇹🇳

■آآآآه تونس مش مِطَبَّعَة رسمياً، بس بيحصل إيه؟

■ السياحة_الدينية اليهو.دية مفتوحة للإسرائيليين، وكل سنة بييجوا يحتفلوا فـى جربة تحت حماية الأمن التونسى، وجوازات السفر الإسرائيلية بتدخل، وبيتصوروا وبينبسطوا، ويقولوا “تحيا تونس”، وبالمناسبة، فى رجال أعمال تونسيين بيشتغلوا من تحت الترابيزة فى شركات ليها علاقة بإسرائيل عن طريق أوروبا!!!

■فـ لما تيجى تقولى “لا للتطبيع” وقتها هقولك التطبيع مش بس علم وسفارة… التطبيع ممكن يبقى باب مفتوح ووشّ مبتسم، وده موجود وبالدليل وأنا وأنت عارفين ده كويس بس أنت كالعادة عامل مش شايف وبدل ما تزايد على بلدك بتزايد على غيرك ..

■ليه؟!

■لإنك لو زايدت على بلدك هتترمى فى السجن فبتطلع طاقتك فى إللى مش هيعملك حاجة ..

■ أخيراً_بقى_لو_إنت_جزائرى 🇩🇿

■ فأنت_بقى أكتر واحد بتحب تقول “إحنا مش مطبعين”، وده جميل، بس تعالى هنا… عملت إيه لفلسطين، لا سلاح، لا دعم لوجستى، لا ضغط دولى مؤثر، ولا حتى حراك سياسى فِعْلِى على الأرض، ده أنت يا راجل لما مصر بتعمل قمة عشان فلسطين رئيسك مش بيحضرها!!!

■فلما تسأل أى جزائرى “إيه إنجاز بلدك؟” يرد يقولك “إحنا مش مطبعين” ..

■ طب_كويس، بس ده موقف سلبى مش فعل إيجابى، يعنى لا ساعدت، ولا طبّعت، بس فى الآخر الفلسطينى

ما إستفدش حاجة!!!

■وكل إللى بتعمله هو تصدير صورة “إحنا أنضف منكم”، بس من غير أى أثر ..

■ والأسئلة_الأهم_من_كل_ده: لما تيجوا تقفوا على معبر رفح وتقولوا “إحنا هنفك الحصار”..

▪︎- مين هيدخلكم؟

▪︎- معاكم موافقات من ليبيا؟

▪︎- من مصر؟

▪︎- لو إسرائيل ضربت، هتقولوا مصر قصّرت؟

▪︎- ولو ميليشيا فلسطينية ضربتكم زى ميليشا ياسر أبو شباب، هتتهمونا بالتواطؤ؟

▪︎- هل حد فيكم فكر حتى فى السيناريو الأمنى؟

▪︎- ولا كله مشهد تمثيلى للكاميرا عشان اللقطة!

■الخلاصة: قبل ما تفكوا الحصار عن غزة، فكوا حصار النِفَاق إللى فى بلادكم، فكوا القيود إللى مربوطة بينكم وبين إسرائيل، وخلوا شعاراتكم تبقى فعل… مش بس بوست وتويتة وسيلفى قدام المعبر ..

■إللى بيدرّب جيش إسرائيل… ما ينفعش يقول أنا جاى أفك حصار غزة، وإللى سايب إسرائيل تدخل بلده تحت أى مسمى، ما ينفعش يزايد على حد، وإللى قاعد ساكت وبيعملش حاجة… ما ينفعش يتكلم على إللى بيحاول …… كفاية كده مؤقتا.