المشاهير والمهرجانات

((( الاحداث فى اسبوع )))

بقلم// اللواء الدكتور سامي دنيا

اللعب الآن ع المكشوف …؟؟

روسيا….

في روسيا المعلم بوتين صحي من النوم وراح موقع مرسوم بزيادة عدد الجيش الروسي لمليون ونص….!!!

إيه يا عم بوتين …. هو إنت ناوي تعمل إيه !!!

قالك وديني وما اعبد لو النيتو فكر يضرب العمق الروسي لاكون جايب اوروبا كلها ع الأرض …

أوكرانيا….

ف اوكرانيا بقا تقريبا كدا زلينسكي أخد الحباية كلها إمبارح وصحي الصبح ومن الفجر طلع الطيارات المسيرة ضربت إيه…!!!

ضربت مخزن لصواريخ إسكندر في منطقة توروبيتس الروسية

انا عايزة أقولكم إن الإنFجارات كانت مروعة لدرجة ان النيران كانت على مساحة ٦ كيلو

هل روسيا هتسكت على كدا….!!!

دا بقا اللي هنشوفه الايام اللي جاية

اللي فات كان حمادة….. واللي جاي بقا حمادة تاني خالص

أمريكا…

ف أمريكا بقا …

الحج بايدن اول ما مسك الرئاسة ف آواخر سنة ٢٠٢٠ كان على صرخة واحدة ويدبدب في الأرض…

السيسي هو ديكتاتور ترامب المفضل..!!

يا حج بايدن إعقل…. يقولك لاء ديكتاور

طب راجع نفسك…. يقولك لاء ديكتاتور

طب يا عم ورينا هتعمل معاه إيه … بروح امك الغالية

وتلف الايام والسنين…. وبعد ما جرب كل حاجة مع مصر اللي وقفتله زي اللقمة ف الزور ومعرفش ياخد لا حق ولا باطل مع مصر ومنع المساعدات ولمؤاخذة العسكرية لمصر دا غير الحرب الإقتصادية

 

رجع الأسبوع ده وقال….!!

مصر هي اقوى دولة في منطقة الشرق الاوسط

والسيسي رجل دولة من طراز فريد

وعلشان نحافظ على الامن القومي هيتم صرف مليار ونص دولار مساعدات عسكرية لمصر

طب وحقوق الإنسان يا معلم بايدن اللي إتحججتوا بيها…!!

قالك أبو ام حروق الانسان على اللي إخترعها

المهم عندنا الامن القومي

طب تفتكروا إيه اللي غير وجهة نظره مرة واحدة !!!

أهم سبب أعتقد من وجهة نظري هو

البنتاجون….!!

أيوا البنتاجون قاله مصر خط احمر….

مصر عقدت صفقة عسكرية ضخمة مع الجيش الصيني

و اول حاجة هتستبدلها جميع المقاتلات الامريكية F16 هتستبدلها بالمقاتلات الصينية

طب هل دا سبب يخلي البنتاجون نفسه يتحرك….!!

طبعا يتحرك ونص

تاني حاجة بدل ما مصر طول عمرها دولة صديقة ومحايدة وراعية للسلام في المنطقة….. دا لحد دلوقتي يعني

هتبقا ضدنا حرفيا….!!!

راحت إدارة بايدن جابت ورا

وبعتت بلينكن للقاهرة أمس علشان يقول للسيسي اوامرك يا سيد المعلمين…

السيسي قاله اقف في الصف يااض ورا أردوغان وتميم….. بالدور يا بهايم

قاله طلباتك يا معلم….!!

قاله محور فلادلفيا…. مشوفش فيه اي خنزير

قاله تمام…. نخلص صفقة الرهائن وتستلم مصر محور فلادلفيا نضيف ومتشطب سوبر لوكس

 

قاله حوار إثيوبيا يخلص….!!!

قاله هنبعت مبعوث من الامم المتحدة ونسمية مبعوث الموارد المائية

ودا لاول مرة في التاريخ …. يتسمى مبعوث كدا

المبعوث ده رايح لإثيوبيا يقولهم كلمة ورد غطاها

النيل خط احمر ….. والسيسي إيده طارشة وإحنا لحد دلوقتي بنشتري خاطرة

بعد كدا ….. بشوقكم بقااا

 

السيسي قاله حوار السودان يخلص…!!

قاله اوامرك يا سيد المعلمين …. دا حتى قوات الدعم السريع عاملين إبادة جماعية وإنتهاك لحقوق الإنسان

دول هيتحاكموا لحد يوم القيامة

السيسي قاله هنبعت معونات إنسانية لميناء بورتوسودان

قاله إنسانية إيه يا معلم …. دا انت تبعت إنسانية وعسكرية كمان

 

السيسي قاله طب وحوار القرن الإفريقي !!

بلينكن قاله شوف يا معلم انت عايز إيه وإعمله هناك …. إنت كبير القارة

السيسي يسكت…. ابدا

راح باعت لإرتريا وزير الخارجية ورئيس المخابرات وبيتم تجهيز إتفاقية دفاع مشترك بين مصر وإرتريا

كدا بالصلاة ع النبي…. إثيوبيا إتحزمت…. علشان هنرقصها على واحدة ونص

كدا موضوع إثيوبيا هيخلص للأبد …. مسألة وقت مش أكتر والله

دا إذا كانت إثيوبيا اصلا فضلت موجودة

هي مش عملت إتفاقية عنتيبي من عشر سنين ضد مصر

مصر مش هتلغي الإتفاقية حضرتك أبسولوتلي….

مصر هتلغي إثيوبيا اصلا من ع الخريطة وهتتقسم

 

هتقولولي كل ده علشان مصر وقعت على إتفاقية عسكرية مع الصين….!!!

هقولك الإتفاقية دي هي الأضخم في تاريخ الجيش الصيني مع دولة بحجم مصر

ولو الإتفاقية دي تمت على خير ومصر فعلا إستبدلت المقاتلات الامريكية بالصينية

ساعتها العالم كله هيقرا الفاتحة على السلاح الامريكي

يابني الإقتصاد الامريكي وقوة امريكا الخارجية قايمة على مصانع السلاح وتجارة السلاح ولو دولة عظمى زي مصر في الشرق الاوسط وإفريقيا إستغنت عنه

يبقا العالم كله هيقرا الفاتحة على السلاح الامريكي حضرتك

وخصوصا العالم كله عارف عظمة الجيش المصري

هضربلك مثال….!!

العالم كله مكنش يعرف ولا يسمع عن الرافال ومكنش حد بيشغلها اصلا غير فرنسا

اول ما مصر طلبتها وشغلتها احسن من فرنسا نفسها….!!

الهند

وباكستان

وقطر

والإمارات

وجنوب افريقيا

واليونان

كل الدول دي طلبت الرافال

عرفتوا بقا ليه قرار تعاون الجيش المصري مع الجيش الصيني أرعب البنتاجون في امريكا !!!

لبنان…

حزب على الله حكايته إمبارح وفي لحظة تم التخلص من ٣ آلاف من القادة بتوعه…. !!!

ومعاهم فوق البيعة السفير الإيراني في لبنان

خبراسود داحقيقي….!!!

اه ياعم ….. دول طلعوا مخترقين يا عم الحج

حزب على الله حكايته بيستخدم جهاز إسمه البيجر في الإتصالات بين القادة وبعضهم

 

الموساد قدر يوصل للشركة اللي بتوردلهم..!!

وزرع في الأجهزة شفرة و٣جرام متFجرات بمجرد تشغيل البرنامج ودخول الشفرة البيجر بووووم في وش اللي ماسكة

حقيقي الموضوع مرعب جدا…!!

وفي لحظة الموساد قدر يكشف ٣٠٠٠ من قادة حزب على الله حكايته وبعتهم على المستشفيات

أصلا من الصدمة لحد دلوقتي حزب على الله حكايته لا حس ولا خبر

ولا حتى حسن زومارة طلع نطق بكلمة…. طب حد يطمنا عليه البيجر بتاعة بخير ولا هو كمان بوووم في وشة

طب إيران يا جدعان هتطلع تقول إيه عن السفير بتاعها اللي راقد في المستشفى

الصراحة يعني هما لا حس ولا خبر لحد دلوقتي…!!

عرفتوا بقا إن عملية ٧ اكتوبر أكبر من إستيعاب إيران وحزب على الله حكايته … ومحدش مصدقني …؟؟

 

الخداع الإستراتيجي على كل أجهزة الامن الاسرا👽ئيلي والتشويش اللي حصل على الأقمار الصناعية العسكرية بااعتهم والحساسات والمجسات بتاعتهم ميعملهوش غير دولة عظمى ومتقدمة عسكريا جدا….

دي علمت على الامريكان نفسهم ….

اللي حصل أكبر من إمكانيات إيران نفسها

والنبي إيران نفسها ما عارفة تمنع الخرق اللي عندها ولا حتى حزب على الله حكايته

اللي حصل ف ٧ اكتوبر هيتدرس في الكليات العسكرية وكليات الحرب العليا لسنين طويلة

 

وفي تحيا مصر

رئيس الوزاراء مصطفى مدبولي كان في السعودية

وبعد ما خلص الإجتماع مع ولي العهد محمد بن سلمان

طلع محمد بن سلمان وبأمر مباشر منه بدخول الصندوق السيادي السعودي للإستثمار في مصر فورا بإستثمارات ٨٥ مليار دولار

منهم ٥ مليار فورا

وهيتعمل أضخم مدينة سياحية على سواحل البحر الأحمر قصاد مدينة الأقصر اللي بتبعد عنها ب ٣٥٠ كيلو

هل دي صدفة….!!!

يا سيدي مفيش حاجة في العالم صدفة !!

 

طلع بقا يابني سطر الجلاليب من جوه

وقول ان مصر بتبيع شواطئ البحر الاحمر للسعودية وشواطئ البحر المتوسط للإمارات

 

ولسة الصندوق السيادي الكويتي بقا…. دي خليها مفاجأة

بص يا سيدي …. هما كلمتين تحطهم حلقة في ودنك

كل ما هيدخلك إستثمارات وإقتصادك هيقوم كل ما الكلاب هتنبح اكتر

لسببين لا ثالث لهما….!!!

اول حاجة أهل الشر شايفين ان خسارة فيك الإستثمارات دي كلها وشايفين إن هما أولى بالفلوس دي كلها

والمفروض ان الخليج يروح يشتري سنادات الدين اللي عندهم علشان في الاخر مش هيدفعوا للخليج ولا دولار علشان شركاتهم وبنوكهم وإقتصادهم بيفلس ….

بالبلدي كدا في الآخر هيقوللهم فلوسك شغلناها وخسرت….

وفي نفس الوقت مش عايزين مصر تبقا دولة محترمة وتكبر !!!

ياعم انت شغل عقلك لثانية واحدة والنبي

ازاي انت عمال تبني مصانع وطرق ومدن وإقتصادك وجيشك بيكبر والسياحة عندك كل سنة أكبر من السنة اللي قبلها وبنتهم الدلوعة جمبك ننوسة عينهم بيتمسح بيها بلاط الكوكب وإستنزاف إقتصاد وإستنزاف جيش وهروب مستثمرين….!!!

لا يابني شغلنا بقا الوحدة ٨٢٠٠ وطلع إشاعات ان مصر بتبيع ارضها للسعوديين والامارتيين

طب ده مش إستثمار…… تؤتؤ بيع

طب مش مشاريع هتتبني…. تؤتؤ بيع

طب مش عملة صعبة هتدخل البلد…. تؤتؤ بيع

طب يا إبن كوم شكاير الكلاب انت عايز إيه!!

لا انت عايز السعودية تيجي تستثمر فلوسها هنا

ولا عايز الإمارتيين ييجو يستثمروا فلوسهم هنا

ولا عايز السوريين ييجوا يفتحوا مصانع هنا

ولا عايز الصينيين ييجوا يبنوا مصانع هنا

ولا عايز الروس

اومال عايز إيه….!!!!

هو لمؤاخذة في الكلمة يعني…. ليه مبسمعش اي هجوم على مستثمر امريكي او فرنسي او انجليزي لما بييجي يستثمر فلوسه في مصر!!!

لو شغلت دماغك ثانية …. هتفهم اللعبة اللي بتتلعب عليك

هما عايزين الخليج في كرشهم ف امريكا واوروبا

وفي لحظة …. ياعيني البنك السويسري خسر ١٠٠ مليار دولار

 

يعني إيه….. يعني السعودية خسرت كل فلوسها اللي إستثمرتها فالبنك السويسر فجلسة بورصة واحدة

مستحيل ده يحصل فمصر حضرتك

عرفت بقا ليه مصر أأمن مكان فالكوكب للإستثمار ….!!!

مصر فعهد السيسي بتكتب التاريخ من اول وجديد

 

كمان في تحيا مصر

فضيلة شيخ الازهر طلع وقال …

لا يجوز لنا كبشر أن نحكم بأن رسالة أفضل من رسالة أو نبي أفضل من نبي

 

طبعا الدنيا قامت ومقعدتش…. !!

رغم إن اللي قاله ده من اصول الدين الإسلامي حضرتك

ربنا قال…..

قُولُوا ءَامَنَّا بِاللَّهِ وَمَا أُنزِلَ إِلَيْنَا وَمَا أُنزِلَ إِلَى إِبْرَاهِيمَ وَإِسْمَعِيلَ وَإِسْحَقَ وَيَعْقُوبَ وَالْأَسْبَاطِ وَمَا أُوتِيَ مُوسَى وَعِيسَى وَمَا أُوتِيَ النَّبِيُّونَ مِن رَّبِّهِمْ لَا نُفَرِّقُ بَيْنَ أَحَدٍ

مِّنْهُمْ وَنَحْنُ لَهُ مُسْلِمُونَ )

 

لو عايز تفهم فلسفة الإختلاف ف الأديان فين….!!

تعالى وانا أقولك

الكلمتين اللي هقولهملك دول لو فهمتهم صح هتستريح دنيا وآخرة….

الإمام الشافعي كان ليه كلمة عظيمة جدا (آمنت بالله .. وبما قال الله .. على مراد الله)

 

خد بالك من كلمة على مراد الله….

خلاف بقا الأديان بينها وبين بعضها معظمه هتلاقيه ديما في فهم …. (ما قال الله)

كل واحد مؤمن إن ربنا قال كذا ومقالش كذا واللي قاله ف ديني هو الصح واللي قاله في دينك غلط من غير حتى ما نقرأه بس هو غلط وخلاص……

طب ياعم إقراه الأول وإفهمه …. يقولك لاء هو غلط وخلاص…!!

 

طب خلاف أهل الدين الواحد بين طوائفه معظمه في فهم (مراد الله) كل واحد معتقد إن مراد الله فيما قاله كذا ومش كذا وانا اللي فاهم صح انما انتوا فاهمين غلط

 

الخناقة بين طوائف الدين الواحد كلها بتدور في ان كل طرف بيدعي معرفته بما قال الله وفهمه لمراد الله والطرف التاني او الطايفة التانية بهايم ومش فاهمين ..

يعني أنا بس اللي عارف ربنا قال إيه وأنا بس اللي فاهم مراده إيه…. ؟!

 

الحساب عند ربنا…. (في ظني اللي جايز يكون برضوا غلط عادي)

هو في ما فعلت بعد ظنك بأن الله قال كذا ومراده منه كذا .. !!

يعني تبقى معتقد إن ربنا قال أمر ما وانت معقتد إن مراده وقصده كذا في هذا الأمر وفي الآخر تكابر ومتنفذهوش ولا تطبقهوش حتى على نفسك وعايز تطبقه على غيرك

 

امشي بالقاعدة دي هتريح نفسك من نقاشات كتير وهتلتمس عذر لناس كتير وهتبقى أهدى بكتير

 

وادعي ربنا يعرفك ما قاله ويبلغك مراده ومقصده

 

كمان في تحيا مصر

الشيخ صلاح التيجاني…..

الحقيقة انا شرحت فوق فلسفة الاديان والطوائف ببساطة شديدة جدا

ومعنديش اي مشكلة هو بيعمل إيه ولا بيعبد ربنا إزاي…. هو حر

ولا حتى عندي مشكلة مع المريدين بتوعة ولا معجبينه ولا حتى هو مين

عم الأولياء….

وبرنس الأصفياء…

الولي الأبيض

انا بس عندي مشكلة ف إنه بيقول…

إمبابة المكرمة…. وعنده مقام ورا البرنس ف إمبابة !!!

لا دا انت كدا برنس وعامل دماغ عنب

شد كمان نفس وقول على الإسكندرية المنورة

كدا عندنا إمبابة المكرمة…. والإسكندرية المنورة

وبالمرة الطواف هيكون في الكعبة اللي عندهم

والإحرام من عند كارتة القاهرة

ورمي الجمرات ….. في بحري

وكدا يبقا إتعشت معانا تمااام …

تصبحوا على خير ……….

مقالات ذات صلة

زر الذهاب إلى الأعلى