بقلم الإعلامية الدكتورة /شيماء الشافعي
هاقول كلام عارفة انه مش هيعجب البعض بس هاقوله لانه الحقيقة او لاقتناعي بيه
المصرى المقيم فى السعودية او الامارات او غيرهم فاهم كلامي كويس جداً
هناك مش بس مغلى الايجارات ده مغلى مصاريف المدارس الاهلية واسعار المستوصفات كمان لان الموضوع عرض وطلب..كلما زاد المطلوب مع قلة المعروض زاد السعر
السعودية لوحدها فيها ملايين المصريين وجنسيات اخرى كمان وجودهم هناك عامل حركة اقتصادية فعلا
انت بتقبض المرتب هناك وتصرف جزء كبير منه جوه البلد
هناك رسوم اقامات وايجار ومدارس وعلاج واكل وشرب وغيره
هما هناك بيعملوا ايه كدول اقامة ؟
فى السعودية مثلا..
بيعملوا حاجة اسمها (سعودة ) بيجبروا كل مؤسسة عندهم على الالتزام بعدد معين من العمالة يكونوا سعوديين ومن ابناء البلد والباقى يكونوا مقيمين او وافدين
بيطبقوا قوانين صارمة على الوافد لو خالفها ممكن يترحل
رغم كده جت عليهم فترة كان فى مقيمين هناك كتير مخالفين شروط الإقامة و اوضاعهم غير متوفقة
ابتدوا يحصروهم ويوقعوا عليهم الغرامات الى اخره من وسائل تعامل
او اعطاء مهلات للتوفيق
فانت هنا لما تتكلم فى ملف المقيمين عندك فى مصر فرق تماما بين مصطلح (لاجىء )وبين مصطلح (مقيم)
مش هاتكلم فى الشق الامنى لانى على ثقة ان الامن المصرى اللى شرب قيادات الإخوان الكابى وجابهم من تحت الارض واللى لبس قيادتهم النقاب
لما لبسوه عشان يهربوا وبردو ما نفعش
الامن المصرى ده مش نايم على ودانه ولا غافل عن مين خطر يمشى فورا ومين ممكن يقعد فترة انتقالية عشان يوفق اوضاعه
لكن معايرة غيرك بانه لاجىء وماعندوش وطن دا طبعاً شيء غير إنساني !
لان الفضل للي انت فيه هنا لله اولا
ثم لجيشك القوى اللى خد الضربة فى صدره وخلاك حاسس بمنتهى الامان لدرجة انك بقيت بتعاير غيرك !
كل دول العالم فيها مقيمين ووافدين من جنسيات اخرى ولكم فى امريكا وكندا والمانيا وايطاليا وغيرهم لعبرة
مفيش دولة بتقفل بابها بالمفتاح فى ظل العولمة دى وتقول مش هادخل الجنسية الفلانية
الا لو فى اسباب بقي عداءات وحروب تاريخية وغيره
ف كون الدولة المصرية مدت المهلة سنة للمقيمين والاجانب لتوفيق اوضاعهم فهى مش الدولة الهبلة ولا الدولة اللى خدعتك او ضحكت عليك بفيلم المقيمين ولكنها المدة المنطقية فعلا
الظروف اجبرتنا كدولة لاستقبال كل الاعداد دى فى وقت واحد وده حمل كبير فعلا لا ننكره
ولكنه دليل على ان مصر الكبيرة فعلا افعال مش كلام واللى وقت الجد ووقت ما اتعايرت بالفقر وبالفلس شالت عدد يفوق عدد سكان كذا دولة خليجية مجتمعة سوا ولسه ثابته وواقفة
-انا مع عودة اللاجئين اللى بلادهم اللى اصبحت امان وتسمح لهم فعلا بظروف العودة والعيش فيها بامان.
-اما المقيمين (ودول غير اللاجئين )
فانا مع تطبيق قوانين الاقامات بصرامة وبرسوم دولارية عالية سنويا مع ترحيل فورى لاى مقيم متطاول على مصر بحرف او بكلمة .
-مع ترحيل فورى لكل مقيم له اى نشاط مشبوه فى احتكار سلعة او غسيل اموال .
-مع فرض قانون على كل مؤسسة او مصنع بنسبة المصريين العاملين زى ما السعودية بتعمل فى مؤسساتها
-انا مع كافة القوانين الصارمة لتنظيم اقامة الجنسيات المختلفة فى مصر
ولكن ضد ادعاء اننا الدولة الهبلة او الدولة اللى بتحارب شعبها لصالح شعوب اخرى.
ضد الافورة والسب واللعن والتعالى على خلق الله ومعايرتهم بجنسهم او لونهم.
