بقلم الاعلامية الدكتورة/شيماء الشافعي
لما بسمع عن حادثة او جريمة صعبة ومحيرة فى اوروبا ولا امريكا
بلاقيهم بياخدوا وقت طويل فى البحث ووممكن ما يوصلوش بسهولة للجانى اصلا
بصراحة الداخلية المصرية حاليا تفوقت على نفسها لانها بالفعل متفوقة على الاخرين فى الدول الاخرى من بدرى ويمكن كلمة ترامب لما زار مصر اخيرا عن الامن والجريمة فى مصر ما كانتش مجاملة ده واقع احنا بقينا شايفينه بعنينا واكيد هم بره راصدينه
خبرين مؤخراً على صفحة الداخلية فى منتهى الأهمية
الاول كشف لغز جريمة شغلت الرأى العام اليومين اللى فاتوا وهى جثث الاطفال الولد واخته واختفاء امهم واخوهم الاصغر اللى اتضح ان هم كمان تم التخلص منهم على يد نفس الجانى تم كشف لغز الجريمة المعقدة دى بمنتهى السرعة والوصول للجانى رغم كل ما فعله لاخفاء جريمته
ما عداش ٧٢ ساعة على الجريمة دى وكان لغزها مفكوك والجانى مضبوط ومش اول جريمة معقدة تقوم الداخلية بفك لغزها بالسرعة دى
الحقيقة ان السرعة فى الأداء اصبحت سمة اساسية واضحة وضوح الشمس فى منهج الداخلية المصرية
الخبر التانى هو خبر ضبط الافندى اللى كان عامل فيديو بخصوص احداث المنيا وبيهدد فيه بحرق الكنايس وبيحرض على فتنة طائفية
اتجاب بمنتهى السرعة ونزلت صورته على صفحة الداخلية
الحمد لله على نعمة بلدنا
احنا متأمنين مش بس على حدودنا-لا
احنا متأمنين جوه وبره الحمد لله وبفضل عيون سهرانة ورجالة شغالة على حمايتنا سواء جيش او شرطة
منتهى الفخر بجد بمؤسسات الدولة المصرية العظيمة اللى اصبحت فى اقوى حالاتها
المؤسسات اللى تم استهدافها بشدة فى ٢٠١١ وما بعدها من قوى الشر والظلام لأنهم عارفين كويس ان صلابة المؤسسات دى عنصر هام فى صلابة الدولة ككل
المؤسسات اللى قدمت دم ولادها الطاهر عشان احنا النهاردة نستمتع بكل هذا الأمن والأمان
تحية وتقدير …وتحيا مصر🇪🇬💪
