المشاهير والمهرجانات

((( الحقيقة والخداع ……. هااااااااااام جدا )))

بقلم اللواء الدكتور سامي دنيا

وقالوا الساحل الطيب والساحل الشرير

خلق الكراهيه وإبداع اسبابها علوم الشيطان

مصر بتكبر وبتبنى عشان كده بيهاجموا كل جديد

خدعوك وقالوا الساحل الطيب والساحل الشرير :

هل الساحل الشمالى هو الأعلى فى المستوى ؟؟ ام توجد أماكن كثيره جدا فى مصر بسواحلها الممتده والغنيه بالتنوع؟؟

بلاجدال توجد اماكن لايمكن احصائها فى مصر ومستويات متنوعه من الفنادق والمنتجعات بدءا من برنيس اقصى جنوب البحر الاحمر مرورا بمرسى علم ثم القصير ثم سفاجه، ثم خليج سوماباى، ثم سهل حشيش، ثم الغردقه، ثم الجونه، ثم رأس غارب، ثم السخنه ، ثم السويس، ثم الإسماعيلية ، ثم بورسعيد

ويتخللهم الكثير جدا جدا جدا من الفنادق والقرى والمنتجعات العالميه متعددة المستويات السعريه

فنجد هناك الغرفه فى اليوم ب ٣٠٠ جنيه واخرى فى اليوم بمليون جنيه (( وحقيقى وهناك بأكثر من مليون جنيه فى اليوم )) وهى طبقا لمستويات من السائحين والاثرياء الذى تخاطبهم هذه المنتجعات فى الاماكن السياحيه البديعه المتفرده عالميا

وان دخلنا الى سيناء الغاليه فحدث وانت سعيد عن العريش ونويبع وسانت كاترين وطابا وشرم الشيخ وراس محمد وغيرها الكثير والكثير من الاف الفنادق والقرى السياحيه والمنتجعات ايضا مع اختلاف مستوياتها وامكانياتها

وعلى المتوسط الكثير والكثير بدءا من بورسعيد حتى السلوم على حدودنا مع ليبيا

اضاء انوارها العلمين الجديده الرائعه ومنتجعات جميله جديده تزداد يوما بعد يوم

هذه جوله صغيره للغايه على سواحلنا الجميله لماذا يلصقون الثراء والسلبيات ويسلطون الضوء بسلبيه على الساحل الشمالى ؟؟؟:

طبيعى هنكبر ونتقدم دون هجوم وتشويه او بالبلدي مالقوش فى الورد عيب قالوا يا احمر الخدين

زى ماهاجموا العاصمه الاداريه الجديده وقالوا مالهاش لزمه وهيا سبب ازمة مصر

وقالوا هيحرقوا ويهدوا ويبيعوا العاصمه القديمه واما بدأوا يجددوا ويوسعوا شويه يشتكوا من هدم المقابر ويقولوا اثريه وشويه كفايه كبارى وشويه حرام عليكم الشجر وغيرها من الهجوم الذى سيظل مستمر

 

فطبيعي يخلقوا حاجات يهاجموا بيها التوسع الهائل المصرى على سواحل البحر المتوسط المهجوره والغير مستغله من مئات السنين سواء اقتصاديا او اجتماعيا او سياحيا(( وكمان نوويا ))

خلق الكراهيه وإبداع اسبابها علوم الشيطان :

قلنا اساس تدمير الدول والشعوب خلق كراهيه واحتراب داخلى

طيب فشلوا يخلقوا فتنه بين مسلمين ومسيحيين رغم انهم طول الوقت فى الملف ده بيحاولوا (( بمعنى طول الوقت ))

طيب فاشلين يعملوا كراهيه على اساس قبلى وبحرى او بدوى او غيرها

قالوا يشوهوا صورة الأغنياء ويزرعوا كراهيه مطلقه ضدهم وانسب وقت استغلال غلاء الاسعار والناس مطحونه دلوقت :

نفس الفكره اللى سوقت ليها ثورة يوليو ١٩٥٢م للأسف بشكل مطلق لان بالفعل مكنش كل البشوات والاثرياء اقطاعيين واشرار وناهبين البلد

ثم صدرت افلام المقاولات فى الثمانينات ان الانفتاح خلق معه أثرياء طامعين ومرتشين وسارقين البلد برضوا بشكل مطلق

وليهم خمسة اعوام ومنذ بدء ظهور نجم العلمين وبداية اتضاح معالمها والمصاحب لها بالساحل الشمالى من منتجعات وتجمعات استثمارية ذات مستويات رائعه وتضاهى مستويات عالميه مثل اماكن اخرى كثيره فى مصر

بدأ الهجوم الصاخب

استغلال الاحداث وخلق الكراهيه :

 

افشال الامل عند الشباب وتدمير أهمية العلم بابراز نماذج وتصديرها للمشهد ولكن بشكل سلبى للغايه

على سبيل المثال التركيز على ثراء مغنيين المهرجانات ومحمد رمضان وغيرهم وسياراتهم الفارهه ومنازلهم وسهراتهم وكميات الذهب الذى يرتدونه وغيرها الكثير

وكل ماسبق ليس سئ ولا مشوه ولا غير طبيعى :

 

= ولكن كيفية الغرض والغرض منها

 

= على سبيل المثال حمو بيكا قال كثيرا انا اتمرمط واشتغلت كل حاجه وعلى عربيه نقل والحمد لله ان ربنا كرمنى ونجحت وقال التعليم مهم جدا وهعلم ولادى عشان يكونوا احسن منى وبيعمل خير كتير جدا

لو اتعرض النموذج لغاية كده او من زاوية رواية الايجابيات دى هيكون نموذج مشجع للشباب على أهمية العلم وايضا الاصرار على النجاح

لكن لو عرضنا وركزنا فقط على نموذج حمو بيكا فى خناقات وسلبيات وانه فوق القانون ومحدش هيعمله حاجه وان العلم مالوش اى لزمه وانه عمل ملايين ومش متعلم وكان هيفيدنا بايه العلم وغيرها

 

هنلاقى الموضوع هدام جدا جدا جدا

نفس الشئ على الساحل الشمالى اللى اتصنف طيب وشرير :

الكلام وابراز الاسعار وكلام ان زجاجة مياه معدنيه ب ٢٠٠ جنيه وتكلفة انتظار عربيه ب ٢٠٠٠ جنبه وغيرها من الامور دى وصياغتها بشكل مستفز للغايه ونشرها بتمويل وبكثافه لاستهداف حالة الضيق من الغلاء والازمه الاقتصاديه التى يعانى منها الجميع

رغم ان اسعار اغلى من كده كمان فى اماكن اخرى كثيره داخل مصر تخاطب شرائح من أثرياء العالم فى السياحه او أثرياء العرب او المصريين لكن لن نجد اى شعور بغضب او ضغينه او حنق اتجاههم

ان يتم عرض سيارات او تكلفة عاليه للغايه والتركيز فيها وتكثيف تعليقات مأجوره من حسابات مزيفه تتحدث ان اللى يشترى عربيه بالسعر ده او يدفع كل الفلوس دى فى زجاجة مياه او انتظار سياره او غيرها

هو حرامى وسارق فلوس البلد وماصص دم الغلابه

(( مع تكرار النشر وتكرار التعليقات من مبدأ الزن على الودان امر من السحر ))

طبيعى مع التكرار وإصابة الكثيرين بالاحباط وعدم تحكيم العقل او الدين ان الطبيعى خلق الله الناس طبقات فيها الثرى ومتوسط الثراء وشديد الثراء

وايضا المتوسط والفقير والفقير جدا

وعندما نرى نفس السيارات الفارهه والثراء فى اعلانات دبى او الامارات ننبهر ونظل نلقى بسيل الاتهامات على مصر ايضا شايفين الامارات عملت ايه واحنا محلك سر مش عارفين نعمل حاجه كويسه زيهم كمصر

لكن نشوف ده فى مصر بدال مانفرح يركبنا مليون عفريت

طبيعى المنتجعات دى والتجمعات دى تبرز السيارات والرفاهيه وغيرها كاسلوب تسويق يخاطب الاثرياء لكن اهل الشر يحرفون ذلك لصناعة كراهيه ومقت وغضب من الأثرياء وتشويه صورتهم

رغم ان كل الدول والمجتمعات قائمه على فلوس الأثرياء هيا اللى بتخلق شغل للفقراء الأثرياء يمولوا المشاريع ويبنيها ويكبرها ويشتغل فيها باقى الشعب على كافة مستوياته غير السياحه والأنشطة المرتبطه بيه

والسياحه دى اللى بدخل الدولار

(( اللى بنستورد بيه قمح الرغيف المدعم بتاع الفقراء))

اذا كل واحد فى المجتمع ليه دور محدد ومفيش مجتمع ينفع يعيش بدون اى فئه منه مينفعش يكون كله طبقه واحده بمستوى واحد هيفشل ولن يتقدم ابدا

مصر بتكبر وبتبنى عشان كده بيهاجموا كل جديد :

اى حاجه مصر هتعملها كويس او تبنيها جديد لازم هيتم استهدافها مباشرة وتشويه كل حاجه تخصها

زى ماعملوا مع قناة السويس الجديده وغيرها من مشروعاتنا

ولازم نكون واعيين ونبعد عن اى شئ سلبى

 

وكمان بصراحه لو انت/انتى اسوياء طبيعى لما نشوف حاجه حلوه مع حد نقول ربنا يبارك ليه فيها ويزيدها مش نشعر بالاحباط او الكراهيه اتجاهه

والناس كلها واقعيا زى بعض كلهم بيملكوا نفس النقاط ولو افترضنا كلنا بنملك ٢٠ نقطه :

 

هنلاقى الغنى يملك ١٠ نقاط كاملين من العشرين مال وثراء والعشره اللى فاضله موزعه على اولاد وصحه وتعليم واحترام وغيرها

والمتوسط وهو الافضل هيتوزعوا العشرين بالتساوي على كل حاجه

اما الفقير هتلاقى نقاط قليله على المال والاكثر صحه واولاد وغيرها

انت مش عارف مشاكل غيرك ولا المصايب والكوارث اللى عنده فبلاش تاخد بالظاهر وتفترض ان حياته جميله

واحنا بلدنا طيبه وارضها طيبه وسواحلنا طيبه وناسنا طيبه (( ومعندناش حاجه على ارضنا نقول عليها شرير ))

وربنا يزيد المدن الجميله على السواحل ويزيد العمار وفرص العمل والاستثمار والنجاح لبلدنا (( عشان كلنا ننجح معاها ونستفيد ونكبر ))

حفظ الله مصر وشعبها بخير وتقدم وأمان.

مقالات ذات صلة

زر الذهاب إلى الأعلى