حصريا : مرة آخرى مزيد من الإبداع يا مصر                بقصر عابدين يوم ٨ نوفمبر2025.

بقلم اللواء الدكتور سامي دنيا

🛑 🛑 🛑 لـ أول مرة فى تاريخه يُقام فى مصر

أفخم حدث عالمى يُنقل من أوروبا إلى مصر

ملوك وأمراء أوروبا في مصر السبت القادم

🛑 كمصر بتستعد حضرتك لأفخم حدث عالمى بيُقام لأول مرة خارج أوروبا، إيه قصة الحدث ده بالتحديد هقولك ده حدث تاريخى، لأنه لأول مرة بيتحرك من إمارة موناكو ومن أوروبا لـ مصر بقصر عابدين…طب هى إيه قصة هذا الحدث ده وإيه تفصيلته؟..

🛑 هل هو حدث سياسى ودبلوماسى ولا ثقافى؟!….أنا_هقولك .. الحدث ده حضرتك هو أفخم حفل ملكى إسمه”جراند بول”، جراند بول ده كان بيُقام فى إمارة موناكو بأوروبا كل سنة، ده حدث سنوى بيضم ملوك وأمراء أوروبا إللى هما الطبقة النخبوية فى أوروبا المتحكمين فى قطاع المال والأعمال والبيزنس والسياسة والشأن الدبلوماسى واللاعبيين الأساسيين فى العالم خلف الكواليس بيحضروا الحفل ده، وبيكون ليهم إتفاقيات مع بعض وتعاقدات مع بعض، وبيكون ليه وجه ثقافى وحضارى طبعًا ..

🛑إختيار مصر المرادى مجاش بالصدفة حضرتك، لإن بالفعل مصر قدرت إنها الفترة إللى فاتت تحول نفسها من مجرد دولة محورية بتحاول تستعيد نفوذها بالشرق الأوسط لـ دولة ذات محاور عالمية وتتداخل بأوروبا وتكون جزء أو قطعة من السياسة الأوروبية وفى نفس الوقت من السياسة الشرقية والإفريقية والأسوية…فمصر النهارده بتستضيف الحدث ده إللى كان فيه جهود دبلوماسية ضخمة جدًا ما بين أوروبا ومصر حتى تكون مصر فى قلب هذا الحدث وده بيُعَد شهادة ميلاد جديدة لمصر تانى بكرر وده بيُعَد شهادة ميلاد جديدة لمصر بإن…مصر بالفعل قادرة على إستضافة الأحداث العالمية خاصًه أنه بيجى بعد أقل من شهر ونص من قمة شرم الشيخ للسلام إللى حضر فيها رؤساء وملوك العالم و كمان القمة الأوروبية المصرية وإفتتاح المتحف المصرى الكبير .. وخمسة وخميسة عليك يا معشوقتى الجميلة دائما يا مصر 🇪🇬

🛑 والحدث ده زى ما ليه تابعيات سياسية ودبلوماسية ليه كمان تابعيات حضارية وفنية، إنت النهاردة بتغير وجه القاهرة إللى هى كانت بتتصدر عنها التقارير السيئة إللى كانت فى يوم من الأيام سبب رئيسى فى العزوف الإقتصادى عن مجىء الإستثمارات لمصر بضخامه، أنت النهارده بتحاول تحط القاهرة على وجه خريطة العالمية من حيث السياحة وكمان إنها بلد واعدة إقتصاديًا ولديها مشروعاتها الخاصة وبلد بتسعى للسلام دبلوماسيًا وبتحاول تعمق دبلوماسيتها فى قلب أوروبا وبتستعيد مكانتها وكمان جايين فى قصر عابدين إللى هو واحد من التُحف المعمارية النادرة فى العالم .

🛑 وخد_دى_معلومة_ليك.. الدولة الفترة إللى فاتت أعادت تطوير قصر عابدين مرة تانية وعشان يكون جاهز لإستضافه الأحداث العالمية، إذن إنت النهاردة عندك تطوير شغال فى منطقة عابدين فى قلب القاهرة بعد ما كان التطوير شغال على المحاور الرئيسية المؤدية للمتحف المصرى الكبير، يبقى أنت النهاردة عرفت عملية تطوير الطرق والكبارى والقصة دى كلها وعشان تقدر تستضيف الأحداث العالمية…الأحداث العالمية دى هتخلى وكالات التصنيف الدولية والمستثمريين الدوليين يحطوك على الرادار بتاعهم وبالتالى هتبدأ تتجه ليك الإستثمارات سواء كانت إستثمارات فى مشروعات أو أذون خزانة زى ما تسميها سميها …….. المهم مصر فى الطريق للوقوف فى صف الكبار رضى من رضى وابي من ابي والخير قااااااادم بإذن الله .

🛑جراند بول ده أهميته إيه؟ تعالى أقولك.. بس قبل ما أقولك الجانب الحضارى والفنى عايز أقولك الجانب السياسى والدبلوماسى، كل الملوك والأمراء والنبلاء والبارزين والطبقات الحاكمة فى أوروبا كل دول هيكون متواجدين عندك هنا، ….. فى قلب القاهرة المصرية.فـ هيعملوا معاك صفقات وهيكون معاهم مسئولين مصريين ورجال أعمال مصريين تُقال وقد يحضر الرئيس المصرى عبد الفتاح السيسى والحكومة المصرية، ده هيفتح الباب للقاءات ثنائية وبالتالى الصفقات دى من نوعية صفقات الإقتصاد، الجانب الإقتصادى ونقل الشركات والأعمال هنا فى القاهرة، وتصبح القاهرة مركز لتخطيط الإستثمارات والبيزنس خلال الفترة القادمة ويكون لينا نصيب كبير ليها …… ان شاء الله.

🛑 تعالى بقى أقولك جراند بول ده إيه؟ ده أضخم و أرقى حفل ملكى فى العالم، و بيتعمل كل سنة بمشاركة الأسر المالكة فى أوروبا ، وبمشاركة نبلاء أوروبا والقصور الملكية المهمة حول العالم، و كمان بيشارك فيه أثرياء وفنانين عالميين زى نجوم من هوليود، ده غير إنه بيكون ملتقى لأرقى أنواع الفن الكلاسيكى بحضور فنى لأهم الأصوات الأوبرالية..ومن خلال تنظيم حدث عالمى راقى بالمستوى ده، مصر هتتحول لوجهة إستثنائية لأحد أكثر الأحداث الملكية رُقِى ورفاهية وتأثير على مستوى العالم ..

🛑 ده غير أن تنظيم حدث بالحجم والقيمة دى بيعكس الثقة فى قدرة مصر على تنظيم فعاليات عالمية، وبيفيد المشروع المصرى الثقافى لربط التاريخ المصرى الملكى العريق مع الفخامة الأوروبية الحديثة، فى سياق حضارى واحد بعد إهمال تقديم تراث مصر فى الدولة الحديثة إللى عندنا منها أثار مهمة جدًا، من قصور تاريخية راقية لا مثيل لها إلا فى أوروبا، ومع ذلك مش بتستفيد منها مصر بالشكل إللى تستحقه، ولا كانت بتساهم فى التأثير الحقيقى على صورة مصر الحديثة قصاد العالم ..

🛑 وكمان_الحفل بيتضمن دايماً إستعراض للتقاليد الملكية الأنيقة فى تنظيمه، وبيشمل ملابس رسمية فاخرة لضيوفه، يعنى من الآخر كأنك بتشوف فيلم ملكى فخم كده بالظبط… فى جمال أكتر من كده ممكن تعملوا كحدث يبقى حديث المنطقة والعالم ويرتبط مع إسم مصر ..

🛑 كمان_الحدث ده زى ما هو حدث ثقافى وسياحى راقى، فهو بيعتبر أيقونة عمل خيرى ضخم، وبيستهدف فى الأساس تمويل أعمال خيرية إنسانية، خاصة لصالح الأعمال الخيرية لصالح الأطفال والنساء والفن، وهو بيتعمل ضمن مبادرات عالمية معروفة فى الأعمال الخيرية زى “مانح الأمل” ..

🛑 ببساطة متخيل حجم حدث إجتماعى ملكى يتجمع فيه نبلاء وأسر مالكة فى حدث خيرى عالمى مرموق بتغطيه مئات وسائل الإعلام وبيستقطب أثرياء العالم لبلدك بالشكل العظيم ده ..

🛑يعنى حفل بالمستوى ده هو مادة خام للترويج الفخم للبلد إللى بيتعمل فيها، وهيبقى قيمة مضافة للسياحة والثقافة المصرية، خاصة أنه هيرجع الروح لقصور تراثية عظيمة بحجم قصر عابدين إللى هينور بحدث عالمى وسط حفل ملكى راقص كلاسيكى مع عروض موسيقية عالمية، وعروض أزياء فخمة، وحفل أوبرا خيالى لأعلى مستوى فنى.. “طبعاً خلاص المصريين بقوا خبرة في الأوبرا” ..

🛑وختامًا هتبدأ فعاليات الجراند بول القاهرة يوم 7 نوفمبر كما هو مقرر داخل متحف الحضارات المصرية فى الفسطاط، هيبدأ بتنظيم ماستر كلاس دولى بحضور شخصيات مرموقة عالمية فى مجالات الفن والعمل الإنسانى، ومن ضمنهم إسم الفنانة المصرية صفاء أبو السعود ..

🛑 وفى_اليوم_التانى تحديداً 8 نوفمبر، هتبدأ مراسم الحفلة الملكية الأساسية، أو “الجراند بول” الملكى داخل قصر عابدين.. بكل ما فيها من فقرات فن كلاسيكى وعشاء فاخر للضيوف من ملوك وأمراء ونبلاء وشخصيات فنية عالمية …

🛑 و يوم 9 نوفمبر هينظم الجراند بول فاعلية فى دار الأوبرا المصرية تخص الحدث، لتسجل مصر فصل جديد من أحداث الفن والثقافة والتعاون العالمى ……. تعيشى يا بلدى …. يابلدى تعيشى …… والحمد لله رب العالمين…. وإذكروا الله كثيرا لعلكم تفلحون.