بقلم الإعلامية الدكتورة/شيماء الشافعي
لاحظت ان البعض عنده تخوف من اسم برنامج دولة التلاوة وفكرته وانه ممكن يوحى اننا فى دولة دينية او دولة دراويش!
و الحقيقة انا بشوف اننا دولة عانت من الإرهاب ومن التطرف ومن تصدر تجار الدين للساحة وقدروا بالفعل ينشروا فكرهم ده وسط ملايين ويغسلوا عقول الكبار والصغار .
احنا كنا محتاجين احلال لهذا الفكر المتطرف بفكر وسطى مستنير ومش معناه اننا بنبعد عن العلم او بنتجاهل العلم او نكون دراويش زى مابيتقال
لا خالص
اصلا قبل برنامج دولة التلاوة كان فيه برنامج مسابقات علمى اسمه العباقرة ونجح بردو نجاح شديد السنين اللى فاتت وتابعوه ملايين ولاقى كل الدعم من الدولة .
لما تشوف مبادارات الدولة ووزارة الاتصالات والمنح المجانية المقدمة لدراسة الذكاء الاصطناعى او امن سيبرانى او غيره المفتوحة للشباب حاليا وده مجرد نموذج ومثال صغير بس بضربهولك .
لما تشوف زيادة الاهتمام بالبحث العلمى والنشر العلمى وارتفاع واضح لتصنيف الجامعات المصرية وترتيبها حاليا
لما تعرف ان قبل دولة التلاوة عملنا بنك المعرفة المصرى اللى بيخدم ملايين بالمجان وهو اكبر منصة ومكتبة رقمية فى العالم تعرف اننا مش متجاهلين العلم ولا بنحولها لدولة دراويش .
واعتقد اسم دولة التلاوة واللى قد يثير المخاوف عند البعض يمكن لو ترجمناه بصورة تانية انه مثلا اسم بيقول احنا دولة التلاوة الأصلية والأصيلة اللى خرج منها المدرسة المصرية فى التلاوات قبل اى مدرسة تانية هتحس انه اسم مش مبالغ فيه .
النهاردة عندك برنامج دولة التلاوة وامبارح كان عندك برنامج العباقرة و اول امبارح كان عندك تأسيس المفاعل النووى فى الضبعة و اول اول امبارح كان عندك افتتاح اكبر متحف فى العالم وقبله كان عندك برنامج لقاء السحاب بين القامة العلمية والطبية دكتور مجدى يعقوب والعالمى واسطورة الرياضة محمد صلاح.
حط المشاهد دى وغيرهم جنب بعض هتلاقيها مش دولة دراويش بس
دى دولة علم ونور وتصحيح لصورة الإسلام والمسلمين اللى شوهها تجار الدين
