✍️ بقلم محمد حنفي أبو العزم🇪🇬
احتضان الذات جسدياً ونفسياً
في حاجات كتير بنجري وراها من برّه… ونكتشف في الآخر إن اللي كنا محتاجينه كان حضن… بس من نفسنا قبل أي حد.
احتضان الذات جسدياً مش لحظة ضعف… بالعكس، ده تذكير للجسم إنك أمان.
إنك تحط إيدك على كتفك… أو تلم دراعك على صدرك… أو حتى تسند خدك على إيدك، كل ده بيبعث للجهاز العصبي رسالة واحدة:
“أنا هنا… ومش هسيبك لوحدك.”
أما احتضان الذات نفسياً فبيبدأ لما نكفّ عن جلد الذات ونسمح لها إنها تغلط… تتأخر… تتلخبط… بس من غير ما ننكسر.
لما نستبدل جملة “إيه العك ده؟!” بـ “ماشي يا روحي، بنتعلم.”
أصعب علاقة في الحياة مش مع الناس… دي مع الجزء اللي جوانا اللي دايمًا بيقول “كان لازم تبقي أحسن”.
احتضان الذات هو إنك ترجّع الصوت ده لحجمه الطبيعي… وتسمع في الخلفية صوت أحن بيقول:
“كفاية إنك بتحاول… وده في حد ذاته شجاعة.”
تمرين تأملي بسيط: حضن للنفس
اعمل ده آخر اليوم أو قبل النوم:
1. اقفل عينيك وركّز في النفس
2. لف إيدك حوالين صدرك كإنك بتحضن حد بتحبه
3. خد نفس بطيء 4 ثواني… وطلّعه 6 ثواني
4. قول جوه نفسك:
“أنا أستحق اللطف.”
5.افضل في الوضع ده دقيقة أو دقيقتين
الغريبة إن الجسم بيصدّق… والقلب بيهدى… والنفس بتتلم.
احتضان الذات مش رفاهية… ده إعادة بناء.
ويا رب دايمًا تلاقوا نفسكم جنب نفسكم قبل ما تلاقوا حد جنبكم 🤍
