كلمتين وبس ،، اختار دعم بلدك

▪️كلمتين وبس ..اختار دعم بلدك

كلمة تعويم او تحرير سعر صرف كلمة بتمثل كابوس للمصريين لانها دايما مرتبطة بموجات غلاء

وانا واحدة من الناس كمواطنة مش خبيرة اقتصاد اتخضيت من خبر تحرير الصرف زيكم بردو

بس لما فكرت فيها شوية لقيت الموقف المرة دى مختلف
انت محرره وانت واقف على ارض اصلب بكتير من قبل كده

محرره بعد ضربة قوية للسوق السودا نزلت سعر الدولار من ٧٠ ل٤٠ واقل الايام اللى فاتت

محرره بعد توقيع صفقات استثمارية كبيرة وفى انتظار صفقات جديدة اكبر باءذن الله

محرره بالتزامن مع طرح شهادات جديدة بعائد متناقص ٣٠ ٪؜سنويا للسنة الاولى

حاليا عندك الالاف من حائزى الدولار اللى كانوا قاعدين مترقبين وعلى امل السوق السودا تعلى تانى لارقام سابقة ومكاسب حققوها على ٧٠ ودول شغلتهم ولعبتهم المضاربة
بقرار اليوم المضاربة انضربت لهم فى مقتل
لان اصبح سعر البنك بيقرب على سعر السوق السودا الحالى واستحالة يحققوا نفس مكاسبهم الخيالية السابقة

نيجى للفئة الاهم والاكبر وهم المصريين بالخارج واللى احنا فقدنا حوالى ١٠ مليارات دولار السنة اللى فاتت من مدخلاتنا الدولارية بسبب انخفاض تحويلاتهم لمصر لانهم عايزين يحولوا فلوسهم على سعر عالى والفجوة بين البنك والسودا كانت عالية جدا

الناس دى اصبح حاليا قصادها مسار صحيح للاختيار بعد تحرير سعر الصرف النهاردة ..مسار يحقق لها مكسب قريب جدا من السعر اللى كان بيتعرض عليهم من مافيا السوق واللى كانوا بيجمعوا دولار المغتربين

انت كمغترب لما تحول دولار على سعر البنك وليكن ٤٠ مثلا وبعدين تشترى بهم الشهادة الجديدة اللى تم طرحها على ٣٠ ٪؜عائد
اذا انت حققت مكسب يفوق ما كنت هتحققه بتحويلك الدولار فى الضلمة فى السوق السودا
وفى نفس الوقت مش حتكون اذيت ولا ضربت اقتصاد بلدك فى مقتل زى ما حصل السنة االى فاتت

الحلول الاقتصادية موجعة لكنها شافية
احنا فى لحظة محتاجة من كل الناس يحكموا ضميرهم فى اختياراتهم لو عايزين البلد دى تقوم وتتخطى ازماتها

اختاروا دعم بلدكم النهاردة ومش هتندموا بكرة ولا بعده ولا لاخر العمر

من كان همه الدولار فالدولار طالع نازل
اما من كان همه مصر فمصر طالعة وبقوة للامام باءذن الله