الادب والقصه

قصيدة * بعد الفراق * للشاعر ( حسن على الخطيب )

قصيدة * بعد الفراق *
للشاعر ( حسن على الخطيب )

بعد الفراق عشت في سباق وتحدي كان صعب وغريب
بين قلبي اللى كان رافض يسيب وعقلى اللي قاللى مفيش نصيب لازم نسيب نبعد نغيب ونشوف حبيب غير الحبيب

وفضلت اجري شمال يمين وعمال لعقلي اقول امين
وقابلت بعدها ناس تانيين وبدءت قصه من جديد

مرت اسابيع مرت شهور ولسه شعوري نفس الشعور
قلبي حزين مسكين مكسور ومابقتش احسه نهائى سعيد

بعد الوداع عشت في صراع عشت في متاهه عشت في ضياع ورجعت تاني للطباع الوحشه فيا وفجأه سقط القناع عن وشي وبان إنطباع للناس حقيقي مش إصطناع

بان قد إيه وإزاي وليه أنا كنت بحبه ودايب فيه
وقلبي كان متعلق بيه وكان حبه بيجرى فى الوريد

وندمان عليه دلوقتي موت عشان في بعده خلاص بموت وعمرى منى عمال يفوت بس الندم عمره ماهايفيد

بعد الغياب عشت في عذاب عشت في اوهام عشت في سراب وحسيت بااعراض الإنسحاب وكاإنه كان إدمان وساب في جتتي وقلبى علامات ودخلني في حالة إكتئاب

خرجت منها انا بالبطيئ ورجعت أكمل الطريق
اللى مشيته زمان معاه لكن بدونه وأعمل إيه أنا فى النصيب

وأنا فى طريقى قابلته صدفه بصيت فى عينه حسيته لسه
باقى عليا طلبت منه من تانى نرجع ضحك وقاللى مفيش نصيب …..

أشعار * حسن على الخطيب *

شبكه اخر خبر

 

 

مقالات ذات صلة

زر الذهاب إلى الأعلى